ყურის ტკივილი ბავშვებში ჩვეულებრივ ასოცირდება მწვავე შუა ოტიტის განვითარებასთან. ერთადერთი გზა იმის დასაზუსტებლად, მართლა ასეა თუ არა, არის ოტოლარინგოლოგიური გამოკვლევა.

როგორ შეგიძლიათ დაეხმაროთ ყურის ტკივილის დროს თქვენს შვილს სახლის პირობებში?

• მიეცით ბავშვს ანთების საწინააღმდეგო პრეპარატი (იბუპროფენი, პარაცეტამოლი) ასაკის შესაბამისი დოზით. ის შეიძლება გამოიყენოთ მაშინაც კი, თუ სხეულის ტემპერატურა ნორმალურია;
• ჩაუწვეთეთ ყურში წვეთები ადგილობრივი საანესთეზიო საშუალებით (ოტისფენი, ოტიპაქსი, ოტირელაქსი, ანაურანი) შესაბამისი დოზირებით. გაითვალისწინეთ, თუ ყურიდან გამონადენი შეინიშნება, ოტოლარინგოლოგიურ გამოკვლევამდე არაფერის ჩაწვეთება არ შეიძლება!
• ყურში ჩაწვეთებასთან ერთად აუცილებელია ცხვირის წვეთების გამოყენება: წვეთოვანი ვაზოკონსტრიქტორები ცხვირში (ნოქსივინი, გალაზოლინი, სნუპი, ნოზაკარი და ა.შ.), ესეც რა თქმა უნდა შესაბამისი დოზირებით. ცხვირში ჩაწვეთება სასურველია მაშინაც კი, თუ ბავშვი თავისუფლად  სუნთქავს და ცხვირიდან გამონადენი არ შეინიშნება. წვეთები ათავისუფლებს შეშუპებას ევსტახის (სასმენი) მილის მიდამოში და ირიბად შეამცირებს ტკივილსაც.

რა არ უნდა გააკეთოთ!

• გამათბობელი კომპრესი ყურზე – ადგილობრივად ტემპერატურის მატებასთან ერთად მატულობს სისხლის მიმოქცევაც და უარესდება ანთებითი პროცესი, რამაც შეიძლება მხოლოდ ზიანი მიაყენოს ბავშვს;
• ფიტოსანთლების გამოყენება – მათ არ აქვთ ტკივილგამაყუჩებელი და/ან ანთების საწინააღმდეგო ეფექტი და არ მოიტანენ რაიმე სარგებელს. სამაგიეროდ, ფიტოსუპოზიტორიის გამოყენების შემდეგ, მისი ფრაგმენტები შეიძლება დარჩეს გარე სასმენი არხის სანათურში. ხოლო უყურადღებოდ გამოყენების შემთხვევაში კი გამოიწვიოს ყურის კანის დაზიანება;
• ტრადიციული მედიცინის გამოყენება – ყურში სხვადასხვა ცხოველური ქონის, ნივრის კბილის და ა.შ. ჩაწვეთება ან ჩადება. ეს საშუალებები ასევე არანაირად არ გააუმჯობესებს ბავშვის მდგომარეობას. სამაგიეროდ, გამოკვლევისთვის და ყურის დათვალიერებისთვის  საჭირო გახდება დამატებითი პროცედურის ჩატარება – ყურიდან უცხო სხეულების ამოღება, რაც ბავშვის მწვავე ტკივილისა და შფოთვის ფონზე შეიძლება რთული იყოს და პატარა პაციენტში დამატებითი სტრესი გამოწვიოს.

როდის არის საჭირო ოტოლარინგოლოგთან დაუყოვნებელი ვიზიტი (მათ შორის ღამითაც) ?

• ძალიან ძლიერი ტკივილის დროს, რომელიც ის არ ქრება ანთების საწინააღმდეგო პრეპარატების გამოყენების შემდეგაც;
• როდესაც ტკივილთან ერთად სხეულის ტემპერატურა აჭარბებს 39⁰ C-ს, რომელიც არ იკლებს ან უმნიშვნელოდ (0,5 0C-ზე ნაკლები)  მცირდება სიცხის დამწევი საშუალებების მიღების მიუხედავად;
• სიწითლისა და ძლიერი ტკივილის არსებობისას ყურის უკან მიდამოში (მათ შორის ხელის დაჭერისას).

სხვა შემთხვევებში ყურის ტკივილი არ არის საშიში მდგომარეობა და საჭიროებს ექიმის გამოკვლევას მომდევნო 24 საათის განმავლობაში.

გაითვალისწინეთ სპეციალისტების რეკომენდაციები! იყავით ჯანმრთელად!